ການເປີດໂຄງການ

ໃນພິທີ ທ່ານ ຮສ.ປທ. ວິໄຊ ຈັນສະຫວ່າງ ອະທິການບໍດີ ມະຫາວິທະຍາໄລສຸພານຸວົງ ໄດ້ຂຶ້ນກ່າວຕ້ອນຮັບແຂກຢ່າງອົບອຸ່ນ ພ້ອມທັງມີຄຳເຫັນເນັ້ນຢໍ້າເຖິງຄວາມສຳຄັນຂອງໂຄງການສຶກສາ ແລະ ການສ້າງຕົວແບບໃນວຽກງານການສ້າງຄວາມເຂັ້ມແຂງທາງດ້ານການບໍລິຫານຕໍ່ກັບການປະກອບສ່ວນເຂົ້າໃນແຜນພັດທະນາຂະແໜງການສຶກສາໃນ 4 ມະຫາວິທະຍາໄລ ໂດຍສະເພາະກໍແມ່ນເປົ້າໝາຍການພັດທະນາ ມະຫາວິທະຍາໄລສຸພານຸວົງ ພ້ອມທັງກ່າວເປີດພິທີຢ່າງເປັນທາງການ.

ໃນໂອກາດນີ້ ທ່ານ ໄມເຄິນ ລອນນິງ ຜູ້ຕາງໜ້າຈາກໂຄງການ USAID ປະຈຳ ສປປ ລາວ ກໍໄດ້ຂຶ້ນກ່າວຄຳຄິດເຫັນໂດຍທ່ານໄດ້ກ່າວວ່າ: ພິທີມອບ-ຮັບທຶນ ແລະ ເຊັນສັນຍາ ໂຄງການສຶກສາ ແລະ ການສ້າງຕົວແບບໃນວຽກງານການສ້າງຄວາມເຂັ້ມແຂງດ້ານການບໍລິຫານ ໃນຄັ້ງນີ້ ໄດ້ເປັນການຢໍ້າຄືນເຖິງເຈດຈຳນົງຂອງ ສະຫະລັດອາເມຣິກາ ເຊິ່ງມີເປົ້າໝາຍອັນດຽວກັນກໍຄື ການພັດທະນາຊັບພະຍາກອນມະນຸດອ້ອມຂ້າງຂະແໜງການສຶກສາ ໂດຍສະເພາະກໍແມ່ນບັນດາອາຈານ, ກຸ່ມນັກຄົ້ນຄວ້າ, ບັນດານັກສຶກສາ ແລະ ອົງການຈັດຕັ້ງທ້ອງຖິ່ນທີ່ກ່ຽວຂ້ອງ ເຊິ່ງອົງການເຫຼົ່ານີ້ ແມ່ນຈະປະກອບສ່ວນຕໍ່ກັບແຜນພັດທະນາທີ່ໄດ້ກຳນົດໄວ້ໃນແຜນພັດທະນາເສດຖະກິດສັງຄົມແຫ່ງຊາດຄັ້ງທີ IX.